"WASANII TUACHE KUJITENGA NA WAANDISHI WA HABARI" - STEVE NYERERE

MCHEKESHAJI maarufu na muigizaji katika tasnia ya filamu nchini, Steven Mengele maarufu kama Steve Nyerere amewataka wasanii wa filamu nchini kuacha kujitenga na waandishi wa habari kwani wao ni watoto wa baba mmoja.

Steve amesema hayo jijini Dar es Salaam alipokuwa akizungumza na mwandishi wa globu ya jamii juu nini kinachotakiwa kufanywa ili tasnia ya filamu iendelee.

“kuna mahali wasanii tunachemka hasa hili lakutokuwa na mahusiano mazuri na wanahabari huku tukitambua kuwa ili kazi yako ifike haraka kwa jamii ni lazima ushirikiane na vyombo vya habari lakini hapa kwetu kuna baadhi ya wasanii wamekuwa wakiwakwepa waandishi wa habari hata katika mambo ya kawaida katika jamii” amesema Steve.

Amesema kuwa katika ulimwengu wa leo hakuna sababu ya msanii kumkwepa mwandishi wa habari kwani wote ni watoto wa baba mmoja tatizo vyumba tofauti.

Steve ametumia muda huo kwa kuwapongeza wanahabari licha ya kupitia mambo magumu lakini wamekuwa karibu na kila msaniii katika nchi pindi majanga yanapotokea au furaha.

Amesema waandishi ni watu wa ajabu sana kwakuwa wao awajui kuchukia kwani hata ukimtukana yeye yupo tu na wewe atakuandika kwa mazuri au mabaya ili mradi tu jamii ijue unachokifanya.
Amesisitiza kuwa msanii yeyote atakayejitenga na waandishi wa habari umaarufu kwake itabaki kuwa hadithi katika maisha yake ya sanaa.